Raqamli texnologiyalar vazirligida “IT Park 2024: Achievements & Vision” deb nomlangan tadbir tashkil etildi. Unda IT Park’ning 2023-yilda erishgan natijalari va faoliyati sarhisob qilindi.

Tadbirda Raqamli texnologiyalar vaziri Sherzod Shermatov, mahalliy va xorijiy kompaniyalar vakillari, IT Park rezidentlari ishtirok etdi.

Davlatimiz Rahbarining 2023-yil 20-dekabr kuni IT Park majmuasiga boʻlgan tashrifi chogʻida IT Park faoliyatini yanada takomillashtirishga doir bir qancha vazifalar belgilab berilgan edi. Jumladan, mahalliy kompaniyalarni xalqaro maydonda qoʻllab-quvvatlash va xorijiy kompaniyalarni Oʻzbekistonga jalb etish kabi masalalarga alohida e’tibor qaratilgan edi. 

Bugungi tadbirda Prezidentimiz tomonidan belgilab berilgan vazifalarni sifatli amalga oshirish yoʻlida rejalashtirilgan ishlarning taqdimoti boʻlib oʻtdi hamda mahalliy va xorijiy kompaniyalar bilan hamkorlik oʻrnatish masalasiga ham alohida urgʻu berildi.

Ma’lumki, IT Park rezidentlarining eksport hajmi ijobiy dinamikani saqlab qolgan holda jadal surʼatlar bilan oʻsib bormoqda. Yil yakuniga koʻra, IT Park rezidentlarining eksport hajmi 344 million dollarga yetdi, bu oʻtgan yilning mos davriga nisbatan 2,4 barobarga koʻp, taqqoslash uchun: oʻtgan yilgi koʻrsatkich 140 million dollarni tashkil etgan edi.

Xususan, xizmatlar eksportining 57 foizi (196 million dollar) xizmat koʻrsatuvchi kompaniyalarga, 23 foizi (79 million dollar) oziq-ovqat kompaniyalariga va 20 foizi (69 million dollar) BPO xizmatlarini koʻrsatuvchi rezident kompaniyalarga toʻgʻri keldi. Shu bilan birga, asosiy eksport mamlakatlari quyidagilar:

– AQSh 44 foiz (151 million dollar);

– Buyuk Britaniya va YI mamlakatlari 24 foiz (82,5 million dollar);

– MDH davlatlari 20 foiz (69 million dollar);

– Osiyo-Tinch okeani mintaqasi mamlakatlari 8 foiz (27,5 million dollar);

– MENA mamlakatlari 4 foiz (14 million dollar).

Taʼkidlash joizki, eksport hajmining oʻsishiga 2023-yil oxirida eksportga yoʻnaltirilgan rezident kompaniyalar sonining koʻpayishi hisobiga erishildi, ularning soni 551 ta kompaniyani tashkil etdi va bu koʻrsatkich oʻtgan yilning mos davriga nisbatan 1,5 barobar koʻp.

2023-yil yakuni boʻyicha IT Park rezidentlari soni 1652 ta kompaniyani tashkil etdi (ulardan 523 tasi viloyatlarda va 1129 tasi Toshkent shahrida roʻyxatdan oʻtgan), shundan:

– 362 ta taʼlim kompaniyalari;

– 426 ta xorijiy kapital ishtirokidagi korxonalar;

– 400 ta oziq-ovqat kompaniyalari;

– 890 ta xizmat koʻrsatuvchi kompaniyalar.

IT Park rezident kompaniyalari tomonidan koʻrsatilgan xizmatlarning umumiy hajmi 2023-yilda 12,5 trln. soʻmni tashkil etdi. Oʻtgan yili 5,1 trln. soʻmni tashkil etgan xizmatlar hajmi bilan solishtiradigan boʻlsak, 2,4 barobar oʻsishni koʻrish mumkin.

Taʼkidlash joizki, taqdim etilayotgan imtiyozlar tufayli IT Park rezidentlari qoʻshimcha ish oʻrinlari yaratib, mamlakatimizda IT-mutaxassislar safini kengaytirmoqda. 2024-yil 1-yanvar holatiga koʻra, rezident kompaniyalarda 26 mingdan ortiq kishi ish bilan taʼminlangan. Ulardan:

18 950 – dasturchilar;

4 091 – BPO kompaniyalari xodimlari;

2442 – xorijiy mutaxassislar;

736 – IT yoʻnalishlar oʻqituvchilari.

Tadbirda mahalliy kompaniyalarni xalqaro maydonda qoʻllab-quvvatlash va xorijiy kompaniyalarni Oʻzbekistonga jalb etishga yoʻnaltirgan holda IT Park faoliyatini yanada takomillashtirishga alohida eʼtibor qaratildi. 

Shuningdek, 5 milliard dollarlik IT-xizmatlar eksportini amalga oshirish va 2030-yilga kelib mamlakatni rivojlangan mintaqaviy IT-xabga aylantirish borasida qilinayotgan ishlar bo‘yicha axborotlar tinglandi.

IT-kompaniyalarning eksport salohiyatini rivojlantirishga qaratilgan rejalar va qoʻllab-quvvatlash dasturlari hamda preferensiyalar eʼlon qilinib, kelgusi yil uchun asosiy maqsadlar belgilab olindi.

Xususan, “Zero Risk” (Oʻzbekiston bozoriga minimal xavf va xarajatlar bilan kirishni xohlovchi xorijiy IT-kompaniyalar uchun dastur), “Local2Global” (Oʻzbekistondagi mahalliy kompaniyalarni ularning eksport faoliyatini ragʻbatlantirish maqsadida xalqaro bozorlarga chiqishda qoʻllab-quvvatlash) haqida haqida maʼlumotlar berildi.

Tadbir so‘ngida 2023-yilda IT sohasida faol kadrlar tayyorlash, eksport hajmi eng yuqori bo‘lgan, startap loyihalarga sarmoya kiritishda faol ishtirok etgan IT Park rezidentlari taqdirlandi.