Ўзбекистон Жаҳон банкининг 2022 йилги «Давлат сектори рақамли трансформациясининг тенденциялари» номли ҳисоботида алоҳида ўрин олди
2023-02-07 17:55:00 / Вазирлик янгиликлари
Мазкур ҳисоботда «GovTech Maturity Index 2022» (GTMI) индексининг баҳолаш натижаларини, шунингдек, давлат секторидаги рақамли трансформация кўрсаткичлари бўйича 198 мамлакатнинг таҳлили келтирилган.
Ушбу ҳисоботга кўра, Ўзбекистон Республикаси ҳукуматнинг рақамли трансформацияни амалга оширишда илғор тажрибага эга бўлган мамлакатларнинг алоҳида тоифаси сифатида таснифланди ва ушбу йўналишда етакчи мамлакатлар ўрин олган «А» гуруҳига киритилган (2021 йилда Ўзбекистон «Б» гуруҳига киритилган эди).
Ҳисоботда АКТ сиёсатини, стратегияни, электрон ҳукумат лойиҳаларини амалга ошириш ва рақамли кўникмалар соҳасида масъул орган Рақамли технологиялар вазирлиги белгиланганлиги айтиб ўтилган.
Шунингдек, маълумотларни ҳимоя қилиш ва шахсий дахлсизлик қоидаларини амалга ошириш ва уларга риоя қилишни тартибга солувчи шахсга доир маълумотлар тўғрисидаги қонуннинг 2019 йилда қабул қилиниши алоҳида қайд этилган.
Шу жумладан, аҳоли ва тадбиркорлик субъектлари учун Ягона интерактив давлат хизматлари порталида (my.gov.uz), электрон солиқ хизматлари порталида яратилган имкониятлар тўғрисида алоҳида қайд этилган.
Жаҳон банки гуруҳининг GovTech дастури рақамли ҳукуматга комплекс ёндашувни акс эттиради ва 4 та асосий йўналишни ўз ичига олади.
GTMI баҳоланиши Асосий ҳукумат тизимлари индекси (Core Government Systems Index - CGSI), Давлат хизматларини кўрсатиш индекси (Public Service Delivery Index PSDI), Фуқароларнинг рақамли иштироки индекси (Digital Citizen Engagement Index DCEI) ҳамда Сиёсий ва техник арбоблар индекси (GovTech Enablers Index GTEI) кўрсаткичлари асосида амалга оширилади.
Жаҳон банки томонидан тақдим этилган диаграммага кўра, юқоридаги барча кўрсаткичлар бўйича Ўзбекистон дунё давлатларининг ўртача кўрсаткичларидан юқорилигини кўриш мумкин. Хусусан, Давлат хизматларини кўрсатиш индексида республикамиз 0,951 балл тўплаган бўлса, дунё бўйича ушбу кўрсаткич ўртача 0,649 баллни қайд этган. Шунингдек, Сиёсий ва техник арбоблар кўрсаткичи индексида респбликамиз ва ўртача дунё бўйича мос равишда 0,965 ва 0,536 баллар белгиланган.