Tadbirda olimlar, ma’naviyat targ‘ibotchilari, Vazirlik markaziy apparati, soha korxonalari vakillari, shuningdek, Vazirlik tizimidagi oliy ta’lim muassasalari talabalari ishtirok etdi. 

Ushbu tadbir O‘zbekiston Prezidentining buyuk ajdodimiz asos solgan Ikkinchi Uyg‘onish davrining milliy va umuminsoniy mohiyati, yosh avlodni Yangi O‘zbekiston bunyodkorlari etib tarbiyalash borasidagi ulkan o‘rni va ta’sirini inobatga olib, ushbu yo‘nalishda amalga oshirilayotgan tashkiliy-amaliy, ilmiy va ma’naviy-ma’rifiy ishlarni yangi sifat bosqichiga ko‘tarish maqsadida qabul qilingan “Buyuk davlat arbobi va sarkarda, ilm-fan, madaniyat va san’at homiysi Sohibqiron Amir Temur tavalludining 690 yilligini keng nishonlash to‘g‘risida”gi qarori ijrosi doirasida tashkil qilindi.

 Taqdimotda so‘zga chiqqan asar muallifi, O‘zbekiston xalq yozuvchisi Muhammad Ali, Respublika Ma’naviyat va ma’rifat markazi rahbarining birinchi o‘rinbosari Botu Alimovlar bugungi kunda shaxsan Davlatimiz rahbari tomonidan Amir Temur shaxsiga berilayotgan alohida e’tibor, uning hayoti va faoliyatini o‘rganish borasida amalga oshirilayotgan ilmiy izlanishlar, Amir Temurning bolalik va o‘smirlik yillarini aks ettiruvchi “Temurbek” tarixiy asarining yaratilish jarayonlari haqida ma’lumot berishdi. Ma’ruzachilar ushbu tarixiy asar yoshlarimizning Amir Temur haqidagi bilimlari yanada boyishiga xizmat qilishini alohida qayd etib, yig‘ilganlarning har biriga mazkur asar bilan tanishib chiqishni tavsiya qilishdi.

 Ta’kidlash kerakki, ushbu asar aholiga, ayniqsa, yoshlarimizga Sohibqiron bobomiz hayotiga oid o‘ta muhim ma’lumotlarni taqdim etadi. Yana bir e’tiborga sazovor jihati shundaki, asar faqatgina tarixiy dalillarga asoslanmagan bo‘lib, turli qiziqarli voqealar bilan boyitilgan. Kitobni tayyorlashda bugungi kunda jamiyat hayotiga keng kirib borayotgan sun’iy intellekt texnologiyalaridan samarali foydalanilgan.

 Taqdimot davomida akter va aktrisalar tomonidan yosh Temurbek, uning ota-onasining siymosi gavdalantirildi.

 Tadbir so‘ngida Amir Temur timsolida chiqish qilgan aktyor Ma’ruf Otajonov taqdimotga yig‘ilganlarni, butun xalqimizni O‘zbekistonni asrab-avaylashga, uning kelajagi uchun o‘z hissasini qo‘shishga, amalga oshirilayotgan islohotlar jarayonida faol ishtirok etishga chorladi.

 Bundan tashqari, taqdimotda Amir Temur hayoti va faoliyatiga oid qiziqarli so‘rovnoma o‘tkazilib, g‘oliblarga kitoblar sovg‘a qilindi.

Shuningdek, “Ma’naviyat” nashriyoti tomonidan soha xodimlari uchun kitob yaramarkasi ham tashkil qilindi.

 Ma’lumot uchun: Prezident qarori bilan:

joriy yilda Sohibqiron Amir Temur tavalludining 690 yilligini keng nishonlash;

– har yili aprel oyini “Amir Temur oyligi” deb e’lon qilish;

– Amir Temur va temuriylar davri tarixi bilan bog‘liq turkum kitoblar, ilmiy va ilmiy-ommabop asarlarni tayyorlash va chop etish;

– Temuriylar davri manbalari elektron platformasini yaratish hamda mavzuga doir pochta markalarini chop etish va boshqa qator vazifalar belgilab berilgan.