Raqamli texnologiyalar vaziri o‘rinbosari R. Karimjonov Xitoyga xizmat safari doirasida Xidian universiteti rahbariyati bilan uchrashuv o‘tkazdi.

Uchrashuv davomida O‘zbekiston va XXR o‘rtasidagi mavjud hamkorlik aloqalarini raqamlashtirish, ta’lim va yangi innovatsiyalar orqali yanada mustahkamlash borasida hamda o‘zaro aloqalarni yanada kengaytirish imkoniyatlari ko‘rib chiqildi.

Universitet tomonidan 2025-yildan boshlab Raqamli ta’limni rivojlantirish markazi bilan hamkorlikda o‘zbek yoshlari uchun raqamlashtirish sohasiga qaratilgan ta’lim dasturini yo‘lga qo‘yishi ma’lum qilindi.

Qolaversa, universitetning O‘zbekistonda o‘z filialini tashkil qilish masalasi ham tegishli darajada muhokama qilinayotgani va imkoniyatlar o‘rganilayotgani ma’lum qilindi hamda universitet tomonidan O‘zbekistonda IT ta’lim markazi tashkil etilishi bo‘yicha kelishuvga erishildi.

Vazir o‘rinbosari tomonidan raqamli ta’limni rivojlantirish va XXRning ilg‘or tajribasini O‘zbekistonda joriy etish uchun malakali mutaxassisni o‘zbek universitetiga jalb qilish taklif etildi.

Uchrashuv yakunida, universitet Toshkent shahridagi INHA universiteti o‘rtasida o‘zaro hamkorlik memorandumi imzolandi.

Xidian universiteti 1931-yil tashkil topgan bo‘lib, Xitoydagi yetakchi universitetlardan biri hisoblanadi. Universitet elektronika, telekommunikatsiya va axborot texnologiyalari sohalarida kuchli ilmiy bazasi bilan mashhur.