Davlatobod tumanidagi “Yangi O‘zbekiston – yoshlar ziyo maskani” axborot kutubxona markazida yetakchi IT kompaniyalar taqdimoti hamda Algoritm & Mohirdev hamkorligidagi gibrid ta’lim o‘quv markazi ochilish marosimi bo‘lib o‘tdi.

Namangan viloyati hokimligi tashabbusi bilan Raqamli texnologiyalar vazirligi, IT-Park va Namangan Tech Community hamkorligida tashkil etilgan ushbu tadbir mahalliy va respublikadagi IT-kompaniyalar vakillari, frilanserlar, startapchilarni o‘zida jamlab, sohada faoliyat ko‘rsatayotgan IT kompaniyalarni qo‘llab-quvvatlash maqsadida tashkil etildi.

Tadbir avvalida viloyatdagi Fluggi, Compass X, Sitelabs, Tech Data Soft, Axioma Line IT kompaniyalari ko‘rgazmalari, startapchilar ishlanmalari, startaplari, shuningdek, Bionica kompaniyasining robototexnikadagi yutuqlari bilan tanishildi.

So‘ngra, Respublkada yetakchi “Eurosoft” kompaniyasi tijorat direktori Nodirxon Murodxonov Chexiyaning “Dacore IT” kompaniyasi Namangandagi BPO markazi faoliyati, kelgusida Namanganda mazkur kompaniya filialini ochish borasida loyihalarini aytib o‘tdi, Shuningdek, O‘zbekistonda hamda xorijda jami 6 ta –AQSH, Buyuk Britaniya, Kambodja, Rossiya, BAA va Malayziyada o‘z filiallari mavjud “RealSoft” kompaniyasining tijorat direktori Lazizbek Parmanov ham Namangan kompaniya filialini ochish bo‘yicha rejalari to‘g‘risida aytib o‘tdi.

Mazkur tadbirning asosiy qismida “Mohirdev” kompaniyasi asoschisi Anvar Narzullayev kompaniyasi maqsadlari, hamkorlikdagi gibrid ta’limning ahamiyati, IT-sohasining kelajagi to‘g‘risida, “Algoritm ta'lim” direktori va asoschisi Shavkatjon Usmanov “Namangan viloyatida IT-sohasining o‘qitilishi va rivojlanishi, “Mohirdev” ning Namangan IT-ta’lim bozoriga kirishining ahamiyati” haqida yig‘ilganlarga batafsil ma’lumot berishdi. “Mohirdev” asoschisi Shoxrux Halilov esa “Mohirdev” kompaniyasi tarmoqlari, yo‘nalishlari, ichki va tashqi IT-bozoridagi o‘zgarishlarni tushuntirib berdi.

Bundan tashqari, O‘zbekiston mnemonika federatsiyasi raisi Davronbek Turdiyevning “Namangandagi talabalar va o‘quvchilar uchun gibrid IT kurslarining ahamiyati, sun’iy intellekt va inson miyasi imkoniyatlari” borasida nutqi yig‘ilganlar e’tiborini tortdi.

Tadbir so‘nggida viktorinalar o‘tkazilib, g‘olib bo‘lgan o‘quvchi va talabalarga “Algoritm” va “Mohirdev” kompaniyalarining sovg‘alari va o‘qish uchun bonuslar topshirildi.