2025 va 2026-yillarda tarkibi 4 nafar ishtirokchidan iborat bo‘lgan 73 ta terma jamoa natijalari o‘zaro taqqoslanganda, 35 ta mamlakatda o‘rtacha natija yaxshilangan, 38 tasida esa pasayish qayd etilgan. Barcha taqqoslanadigan jamoalar bo‘yicha o‘rtacha dinamika −7,34 ballni, ya’ni −1,84 foizni tashkil etgan.

Shu bilan birga, ayrim davlatlar birinchi kun natijalarida sezilarli o‘sishni namoyish etdi. Mutlaq o‘sish bo‘yicha Daniya +47,59 ball bilan birinchi o‘rinni egallagan. Uning o‘rtacha natijasi 73,16 balldan 120,75 ballga ko‘tarilib, o‘sish 65,05 foizni tashkil etgan.
Keyingi o‘rinlarda Gruziya (+36,50 ball), Janubiy Afrika (+34,57), Litva (+34,03), Argentina (+32,00) va Gresiya (+31,48) joylashgan. O‘zbekiston +27,12 balllik o‘sish bilan ushbu reytingda 9-o‘rinni qayd etgan.

Birinchi kunning mutlaq natijalari bo‘yicha esa Xitoy 246,90 ball bilan yetakchilik qilgan. Avstraliya 211,75, Yaponiya 210,50 va AQSh 205,50 ball bilan keyingi oʻrinlardan joy olgan.

Koreya Respublikasi 192,75, Gonkong 189,90, Turkiya 189,75, Polsha 188,90 va Xorvatiya 184 ball bilan keyingi o‘rinlarni egallagan. O‘zbekistonning o‘rtacha natijasi 174,50 ball bo‘lib, u 14-o‘rinni qayd etgan.

Qiziqarli jihat shundaki, yuqori natija qayd etgan jamoalarning barchasida ham o‘tgan yilga nisbatan o‘sish kuzatilmagan. Masalan, Xitoy 246,90 ball bilan mutlaq yetakchilikni saqlab qolgan bo‘lsa-da, uning natijasi 2025 yilga nisbatan 47,09 ballga kamaygan. Shunga qaramay, Xitoy yaqin raqobatchilaridan sezilarli darajada oldinda qolgan.

Aksincha, AQSh yuqori natija bilan birga ijobiy dinamikani ham qayd etgan: mamlakatning o‘rtacha ko‘rsatkichi 186,55 balldan 205,50 ballga ko‘tarilib, +18,96 ball yoki 10,16 foiz o‘sishni tashkil etgan.

Umumiy ishtirokchilar kesimida ham birinchi kun natijalari o‘tgan yilga nisbatan pasaygan. 2025 yilda 326 nafar ishtirokchining o‘rtacha natijasi 135,43 ballni tashkil etgan bo‘lsa, 2026 yilda mazkur ko‘rsatkich 118,45 ball bo‘lgan. Biroq ishtirokchilar va mamlakatlar sonidagi farq sababli ushbu ko‘rsatkichlarni to‘g‘ridan-to‘g‘ri taqqoslash to‘liq xolis mezon hisoblanmaydi.
Har ikki yilda qatnashgan 84 mamlakat doirasida ham o‘rtacha natija 136,26 balldan 125,14 ballga tushgan. Eng xolis taqqoslash mezoni hisoblangan tarkibi 4 nafardan iborat 73 ta terma jamoa kesimida esa o‘rtacha pasayish 7,34 ballni tashkil etgan.

Shu nuqtai nazardan, IOI 2026 birinchi kuni natijalarida ikki xil tendensiya kuzatilmoqda: bir tomondan, Xitoy, Avstraliya, Yaponiya kabi an’anaviy kuchli jamoalar yuqori mutlaq natijalarni qayd etgan bo‘lsa, ikkinchi tomondan, Daniya, Gruziya, Litva, O‘zbekiston, AQSh kabi terma jamoalar o‘tgan yilga nisbatan sezilarli o‘sishni namoyish etgan.

Olimpiadaning birinchi kuni natijalari shuni ko‘rsatmoqdaki, yuqori natija va natija o‘sishi har doim ham bir xil ko‘rsatkich emas. Ayrim jamoalar yuqori pozitsiyasini saqlab qolgan bo‘lsa, boshqalari esa yillik o‘sish sur’ati bo‘yicha ajralib turgan. Bu esa IOI 2026dagi raqobatning nafaqat natija, balki dinamika nuqtai nazaridan ham yuqori ekanini ko‘rsatadi.