“ICT Week Uzbekistan 2026” doirasida “Digital Investment Forum 2026” bo‘lib o‘tdi. Forum davlat tashkilotlari, xalqaro moliya institutlari, diplomatik korpus vakillari, rivojlanish bo‘yicha hamkorlar hamda texnologik kompaniyalarni bir maydonda jamladi. Tadbirning asosiy e’tibori O‘zbekistonning raqamli iqtisodiyotiga investitsiyalarni jalb etish, xalqaro hamkorlikni kengaytirish va istiqbolli raqamli loyihalarni qo‘llab-quvvatlashga qaratildi.

Forum doirasidagi yuqori darajadagi investitsiyaviy muloqot panel sessiyasida Raqamli texnologiyalar vaziri o‘rinbosari Rustam Karimjonov, Yaponiyaning Ichki ishlar va kommunikatsiyalar vaziri o‘rinbosari Hideo Fuseda, Osiyo taraqqiyot bankining O‘zbekistondagi vakolatxonasi direktori Kanokpan Lao-Araya, Uzum hammuassisi hamda strategiya va biznesni rivojlantirish bo‘yicha rahbari Nikolay Seleznev, Fransiyaning O‘zbekistondagi Favqulodda va Muxtor Elchisi Valid Fuk, Koreya Eximbank’ning O‘zbekistondagi vakolatxonasi rahbari Kang Sangjin ishtirok etdi.

Panel sessiya davomida O‘zbekistonda raqamli infratuzilmani rivojlantirish, texnologik loyihalarga investitsiyalarni jalb qilish, xususiy sektor bilan hamkorlikni kengaytirish hamda xalqaro moliya institutlari va xorijiy hamkorlar bilan yangi tashabbuslarni amalga oshirish istiqbollari muhokama qilindi.

Shuningdek, forum doirasida KOICA Showcase taqdimoti tashkil etilib, KOICAning O‘zbekistondagi vakolatxonasi direktor o‘rinbosari Park Seolri Koreya xalqaro hamkorlik agentligi bilan amalga oshirilayotgan tashabbuslar va istiqboldagi hamkorlik yo‘nalishlari haqida ma’lumot berdi. Forum dasturida strategik grant loyihalarini taqdim etish ham asosiy yo‘nalishlardan biri sifatida belgilangan edi.

Tadbir yakunida xalqaro hamkorlikni yanada rivojlantirishga qaratilgan qator hujjatlar imzolandi. Xususan, UZ-SAT va Telesat o‘rtasida memorandum, UZ-SAT va Nuada Pte. Ltd. o‘rtasida memorandum, shuningdek, Raqamli ta’limni rivojlantirish markazi va Zhongke Ruiyan Technology Co., Ltd. o‘rtasida hamkorlik kelishuvi imzolandi.